”MEDİA könüllüləri” Proqramı Azərbaycan Respublikasının Medianın İnkişafı Agentliyi tərəfindən “Könüllü fəaliyyət haqqında” Azərbaycan Respublikasının Qanununa və Azərbaycan Respublikası Prezidentinin 12 yanvar 2021-ci il tarixli 1249 nömrəli Fərmanı ilə təsdiq edilmiş “Azərbaycan Respublikasının Medianın İnkişafı Agentliyinin Nizamnaməsi”nə müvafiq olaraq həyata keçirilir. Proqram medianın inkişafı prosesində dövlət və cəmiyyət üçün əhəmiyyət kəsb edən layihə və proqramların icrasında gənclərin potensialından səmərəli istifadə edilməsi, onların bilik və bacarıqlarının artırılması, gənclərin ölkə üzrə şəbəkələşməsinin və sosiallaşmasının dəstəklənməsi məqsədilə 15 sentyabr 2021-ci il tarixindən təşkil edilir.

“MEDİA könüllüləri” Proqramının əsas missiyası medianın inkişafının gənclərin təşəbbüsləri əsasında təqdim olunan layihələrlə dəstəklənməsini, gənclərin bu sahədə maarifləndirilməsini və müvafiq prosesdə aktiv iştirakını təmin etməklə yanaşı, mütəmadi olaraq savadlı, müasir, dünyagörüşlü, vətənpərvər, milli köklərə bağlı gənclərin şəxsi və peşəkar inkişaflarına töhfə verməkdir.

3 ay müddətində davam edən “MEDİA könüllüləri” Proqramı çərçivəsində iştirak edən könüllülər üçün “Jurnalistikanın əsasları”, ”Media savadlılığı”, “Rəqəmsal jurnalistika”, “Mediada etika” və jurnalistika ilə əlaqəli digər peşəkar inkişaf təlimləri, eləcə də “Stresin və vaxtın idarə edilməsi”, “Liderlik bacarıqları”, “Yaradıcı düşünmə”, “Nitq mədəniyyəti” və bir çox müxtəlif mövzuları əhatə edən şəxsi inkişaf təlimləri təşkil edilir. Əlavə olaraq “MEDİA könüllüləri” proqramı çərçivəsində könüllülər müxtəlif media subyektlərində 1 aya qədər təcrübə keçirlər.